«Вельмі важна, калі палітыкі прыслухоўваюцца да думкі свайго народу і выконваюць тое, што абяцаюць. Апроч таго, вельмі важны пачатак руху праз пункты пропуску ў цэлым, як мы лічым, для аднаўленьня нармальных дачыненьняў паміж краінамі. Бо спачатку ідуць дачыненьні паміж людзьмі простымі, потым — дачыненьні паміж прадстаўнікамі бізнэсу, а палітыкі потым падцягваюцца. Добра, што ў цэлым атмасфэра і фон такія пазытыўныя», — сказаў Максім Рыжанкоў у эфіры дзяржаўнага тэлеканалу «Першы інфармацыйны».
Міністар сказаў пра задаволенасьць людзей аднаўленьнем памежнага руху з Польшчай, а на пытаньне, што такім чынам Польшча прадэманстравала Літве, адказаў:
«Я мяркую, што Польшча прадэманстравала такі жорсткі нармальны прагматызм».
Літоўскае выданьне LRT паведаміла, што 18 лістапада адбудуцца тэхнічныя перамовы памежных службаў Літвы і Беларусі аб разблякаваньні больш за 1000 літоўскіх грузавікоў, якія засталіся на беларускай тэрыторыі пасьля поўнага закрыцьця мяжы і якія на загад Лукашэнкі былі заблякаваныя беларускай мытняй на стаянках з патрабаваньнем аплаты ў памеры 120 эўра за дзень.
Апроч таго, на гэты ж дзень прызначана паседжаньне Нацыянальнай камісіі бясьпекі Літвы, на якім сярод іншага абмяркуюць сытуацыю на літоўска-беларускай мяжы.
17 лістапада міністар замежных справаў Літвы Кястуціс Будрыс заявіў, што два закрытыя літоўскія пункты пропуску на мяжы зь Беларусьсю могуць аднавіць дзейнасьць раней за 30 лістапада — прызначаны ўрадам Літвы тэрмін.
Польшча 17 лістапада аднавіла працу двух сваіх пунктаў пропуску, адзін зь якіх быў закрыты ў 2021 годзе празь мігранцкі крызіс, а другі ў 2023-м — пасьля выраку журналісту і актывісту польскай меншасьці Анджэю Пачобуту.
27 кастрычніка Літва закрыла два свае пункты пропуску ў адказ на масавыя прылёты паветраных балёнаў з кантрабанднымі цыгарэтамі, якія стваралі небясьпеку для цывільнай авіяцыі ў аэрапартах Вільні і Коўна.
Закрыцьцё пераходаў на мяжы Літвы і Беларусі
- 8 жніўня 2023 году Літва закрыла пункты пропуску Шумск (з боку Беларусі Лоша) і Цьверач (Відзы), 1 сакавіка 2024-га — Лаварышкі (Катлоўка) і Райгорад (Прывалка). На мяжы зь Беларусьсю працягвалі працаваць два памежныя пераходы — Меднікі (Каменны Лог) і Салечнікі (Беняконі).
- Урад Літвы стаў задумвацца пра поўнае закрыцьцё мяжы зь Беларусьсю пасьля таго, як у кастрычніку некалькі разоў вымушана прыпынялася праца аэрапортаў у Вільні і Коўне з прычыны зьяўленьня паблізу іх аэрастатаў, якія, паводле заяваў МЗС Літвы, ляцелі зь Беларусі, несучы кантрабанду, перадусім цыгарэты.
- Да 27 кастрычніка памежная служба Літвы падчас залёту балёнаў з кантрабанднымі цыгарэтамі двойчы цалкам закрывала мяжу зь Беларусьсю на некалькі гадзін уначы. Упершыню мяжа была закрытая ў ноч на 22 кастрычніка.
- А з 27 кастрычніка Літва закрыла яе для беларусаў цалкам, з пэўнымі выняткамі, напрыклад, для вяртаньня на радзіму грамадзян Літвы і для машын з дыпляматычнымі нумарамі. Пункты пропуску на мяжы Літвы і Беларусі Меднікі (Каменны Лог) і Салечнікі (Беняконі) таксама закрылі.
- Урад Літвы заявіў, што мяжа цалкам закрываецца да 30 лістапада, але тэрмін можа быць падоўжаны, калі сытуацыя з залётамі балёнаў не палепшыцца.
- Улады Беларусі ў адказ 31 кастрычніка забаранілі літоўскім грузавікам выяжджаць цераз польскую і латвійскую мяжу.
- Ад 3 лістапада ўлады ў Менску ўвогуле забаранілі рух па тэрыторыі Беларусі грузавікам, зарэгістраваным ува ўсіх краінах Эўразьвязу.
- 10 лістапада на загад Аляксандра Лукашэнкі ўсе літоўскія фуры, якія знаходзяцца ў Беларусі, сабралі на адмысловых пляцоўках і ўзялі пад ахову з выстаўленьнем рахункаў — 120 эўра на содні. Паводле Лукашэнкі, фураў было больш за 1100.
- Увечары 10 лістапада Літва зьвярнулася да Менску з просьбай дазволіць выезд грузавікоў сваіх кампаніяў у Літву. Неўзабаве стала вядома, што Менск адмовіў.
- Міністар унутраных справаў Літвы Ўладзіслаў Кандратовіч у інтэрвію Свабодзе прызнаў, што закрытыя пераходы выкарыстоўваліся таксама для перадачы сродкаў на кантрабанду цыгарэт у Літву, і гэта пачалі вывучаць літоўскія крыміналісты.
- Лукашэнка 31 кастрычніка заявіў, што літоўцы «самі з тэрыторыі Беларусі перакідалі цыгарэты на мэтэаралягічных зондах», каб зарабіць на перапродажы.
- Вільня марна спрабавала вярнуць транспарт шляхам кантактаў на ведамасным узроўні. Беларусь прапанавала Літве або скасаваць рашэньне аб закрыцьці мяжы, або выйсьці на палітычна-дыпляматычнае разьвязаньне праблемы.
- 28 кастрычніка Польшча заявіла, што гатовая адкрыць два памежныя пераходы зь Беларусьсю ў лістападзе. Але 30 кастрычніка пасьля кансультацыяў зь Літвой перанесла гэты неназваны тэрмін яшчэ на некалькі тыдняў. Толькі 17 лістапада адкрыліся двух пункты ў Баброўніках (з боку Беларусі Бераставіца) і ў Кузьніцы (Брузгі). У той жа час кіраўнік МЗС Літвы Кястуціс Будрыс заявіў, што Літва можа адкрыць два закрытыя памежныя пераходы зь Беларусьсю раней за 30 лістапада.
- 19 лістапада ўрад Літвы вырашыў, што закрытыя ў кастрычніку два пункты пропуску на мяжы Літвы і Беларусі Меднікі (Каменны Лог) і Салечнікі (Беняконі) адкрыюцца з 20 лістапада.
- Перад гэтым рашэньнем прэмʼер-міністарка Інга Ругінене заявіла, што апошнім часам паветраных балёнаў з кантрабандавымі цыгарэтамі стала меней. Ругінене таксама адзначыла, што былі «пэўныя пазытыўныя рэчы» і з боку Беларусі.
- Пераходы Меднікі (Каменны Лог) і Салечнікі (Беняконі) зноў адкрыліся 20 лістапада.
Форум