Пра гэта на пасяджэньні Рады Эўразьвязу ў агульных пытаньнях у Брусэлі заявіў намесьнік міністра замежных справаў Літвы Сігітас Міткус, паведамляе сайт МЗС Літвы.
Намесьнік міністра Сігітас Міткус на паседжаньні Рады падняў пытаньне аб гібрыдных атаках Беларусі, накіраваных на парушэньне паветранай прасторы Літвы з выкарыстаньнем бесьпілётных лётных апаратаў. Паводле яго, парушэньні літоўскай паветранай прасторы кантрабанднымі балёнамі, запушчанымі з тэрыторыі Беларусі, трэба разглядаць як сьвядомую гібрыдную апэрацыю.
«Заклікаем ясна пазначыць дзеяньні рэжыму Беларусі як гібрыдную атаку на дзяржаву — сябра Эўразьвязу і разгледзець новыя санкцыі супраць адказных беларускіх чыноўнікаў і ўстановаў», — падкрэсьліў намесьнік кіраўніка МЗС Літвы.
Таксама намесьнік міністра зазначыў, што Беларусь павінна неадкладна дазволіць грузавікам, зарэгістраваным у ЭЗ, вярнуцца на тэрыторыю Эўразьвязу.
«Дзеяньні Беларусі недапушчальныя, яны дыскрымінуюць кампаніі ЭЗ і наносяць дадатковыя фінансавыя страты», — заявіў службовец.
18 лістапада пачаліся тэхнічныя перамовы паміж намесьнікамі кіраўнікоў памежных службаў Беларусі і Літвы наконт адкрыцьця мяжы і заблякаваных на загад Лукашэнкі літоўскіх грузавікоў.
Старшыня камітэту замежных справаў Сейму Літвы Рэмігіюс Мотузас раней заявіў, што рашэньне аб адкрыцьці 2 памежных пераходаў зь Беларусьсю будзе залежаць ад вынікаў перамоваў.
«Рашэньне [аб адкрыцьці мяжы] будзе вызначацца, перш за ўсё, вынікамі тэхнічных перамоваў. Але пакуль, калі зыходзіць з сытуацыі, тэндэнцыя хутчэй схіляецца да таго, што межы могуць быць адкрытыя раней за 30 лістапада. Канчатковае рашэньне будзе прынятае з улікам высноваў і рэкамэндацыяў камісіяў, а таксама рашэньняў на заўтрашнім паседжаньні ўраду», — заявіў Мотузас 18 лістапада ў этэры радыё LRT.
З словаў дэпутата, адкрыцьця мяжы патрабуюць ня толькі некаторыя літоўскія перавозьнікі, але і Кітай, і краіны Цэнтральнай Азіі, незадаволеныя парушанымі ланцужкамі паставак.
Закрыцьцё пераходаў на мяжы Літвы і Беларусі
- 8 жніўня 2023 году Літва закрыла пункты пропуску Шумск (з боку Беларусі Лоша) і Цьверач (Відзы), 1 сакавіка 2024-га — Лаварышкі (Катлоўка) і Райгорад (Прывалка). На мяжы зь Беларусьсю працягвалі працаваць два памежныя пераходы — Меднікі (Каменны Лог) і Салечнікі (Беняконі).
- Урад Літвы стаў задумвацца пра поўнае закрыцьцё мяжы зь Беларусьсю пасьля таго, як у кастрычніку некалькі разоў вымушана прыпынялася праца аэрапортаў у Вільні і Коўне з прычыны зьяўленьня паблізу іх аэрастатаў, якія, паводле заяваў МЗС Літвы, ляцелі зь Беларусі, несучы кантрабанду, перадусім цыгарэты.
- Да 27 кастрычніка памежная служба Літвы падчас залёту балёнаў з кантрабанднымі цыгарэтамі двойчы цалкам закрывала мяжу зь Беларусьсю на некалькі гадзін уначы. Упершыню мяжа была закрытая ў ноч на 22 кастрычніка.
- А з 27 кастрычніка Літва закрыла яе для беларусаў цалкам, з пэўнымі выняткамі, напрыклад, для вяртаньня на радзіму грамадзян Літвы і для машын з дыпляматычнымі нумарамі. Пункты пропуску на мяжы Літвы і Беларусі Меднікі (Каменны Лог) і Салечнікі (Беняконі) таксама закрылі.
- Урад Літвы заявіў, што мяжа цалкам закрываецца да 30 лістапада, але тэрмін можа быць падоўжаны, калі сытуацыя з залётамі балёнаў не палепшыцца.
- Улады Беларусі ў адказ 31 кастрычніка забаранілі літоўскім грузавікам выяжджаць цераз польскую і латвійскую мяжу.
- Ад 3 лістапада ўлады ў Менску ўвогуле забаранілі рух па тэрыторыі Беларусі грузавікам, зарэгістраваным ува ўсіх краінах Эўразьвязу.
- 10 лістапада на загад Аляксандра Лукашэнкі ўсе літоўскія фуры, якія знаходзяцца ў Беларусі, сабралі на адмысловых пляцоўках і ўзялі пад ахову з выстаўленьнем рахункаў — 120 эўра на содні. Паводле Лукашэнкі, фураў было больш за 1100.
- Увечары 10 лістапада Літва зьвярнулася да Менску з просьбай дазволіць выезд грузавікоў сваіх кампаніяў у Літву. Неўзабаве стала вядома, што Менск адмовіў.
- Міністар унутраных справаў Літвы Ўладзіслаў Кандратовіч у інтэрвію Свабодзе прызнаў, што закрытыя пераходы выкарыстоўваліся таксама для перадачы сродкаў на кантрабанду цыгарэт у Літву, і гэта пачалі вывучаць літоўскія крыміналісты.
- Лукашэнка 31 кастрычніка заявіў, што літоўцы «самі з тэрыторыі Беларусі перакідалі цыгарэты на мэтэаралягічных зондах», каб зарабіць на перапродажы.
- Вільня марна спрабавала вярнуць транспарт шляхам кантактаў на ведамасным узроўні. Беларусь прапанавала Літве або скасаваць рашэньне аб закрыцьці мяжы, або выйсьці на палітычна-дыпляматычнае разьвязаньне праблемы.
- 28 кастрычніка Польшча заявіла, што гатовая адкрыць два памежныя пераходы зь Беларусьсю ў лістападзе. Але 30 кастрычніка пасьля кансультацыяў зь Літвой перанесла гэты неназваны тэрмін яшчэ на некалькі тыдняў. Толькі 17 лістапада адкрыліся двух пункты ў Баброўніках (з боку Беларусі Бераставіца) і ў Кузьніцы (Брузгі). У той жа час кіраўнік МЗС Літвы Кястуціс Будрыс заявіў, што Літва можа адкрыць два закрытыя памежныя пераходы зь Беларусьсю раней за 30 лістапада.
- 19 лістапада ўрад Літвы вырашыў, што закрытыя ў кастрычніку два пункты пропуску на мяжы Літвы і Беларусі Меднікі (Каменны Лог) і Салечнікі (Беняконі) адкрыюцца з 20 лістапада.
- Перад гэтым рашэньнем прэмʼер-міністарка Інга Ругінене заявіла, што апошнім часам паветраных балёнаў з кантрабандавымі цыгарэтамі стала меней. Ругінене таксама адзначыла, што былі «пэўныя пазытыўныя рэчы» і з боку Беларусі.
- Пераходы Меднікі (Каменны Лог) і Салечнікі (Беняконі) зноў адкрыліся 20 лістапада.
Форум