«На жаль, я абмежаваны перадаваць публічна інфармацыю. Сёньня, магу [...] сказаць, у мяне была [...] на гэтую тэму сустрэча. І мне сказалі, што на сёньня месцазнаходжаньне Анжалікі Мельнікавай ня вызначана», — сказаў Павал Латушка на брыфінгу ў Варшаве 24 лістапада, паведаміла выданьне «Позірк».
Ужо прайшло больш за дзевяць месяцаў з моманту зьнікненьня Мельнікавай, нагадаў ён: «І няма ніякіх пацьверджаных зьвестак, дзе яна можа знаходзіцца [...] — гэта мне сказалі абсалютна адназначна».
«Ідзе разьбіральніцтва, крымінальная справа. Вядзе яе Агенцтва ўнутранай бясьпекі Польшчы пад наглядам Нацыянальнай пракуратуры», — дадаў Латушка.
Кіраўнік НАУ таксама паведаміў аб новай спробе вярбоўкі спэцслужбамі Менску ягоных паплечнікаў — «за апошнія тыдні»: «Да мяне зьвярнулася таксама [яшчэ] адна актывістка з такім жа самым запытам».
Мельнікава эмігравала зь Беларусі ў верасьні 2020 году. У 2022 годзе ў Польшчы далучылася да НАУ. У ліпені 2024-га яе абралі сьпікерам КР (з канца сакавіка 2025 году функцыі сьпікера выконвала Станіслава Гліньнік, у сярэдзіне траўня новым сьпікерам стаў Арцём Брухан). Мае беларускае і польскае грамадзянства.
28 сакавіка стала вядома, што Мельнікава знаходзіцца не на тэрыторыі Польшчы і не выходзіць на сувязь з 25 сакавіка 2025 году. Пачалі выказвацца розныя вэрсіі: ад выкраданьня спэцслужбамі рэжыму Аляксандра Лукашэнкі да таго, што палітык сама была агенткай.
Група журналістаў The Insider і Polityka апублікавала сэрыю матэрыялаў, зь якіх вынікала, што яшчэ напрыканцы лютага Мельнікава вылецела з Варшавы ў Лёндан, у Вялікай Брытаніі перасела на самалёт да Шры-Лянкі, а адтуль — у Дубай. Пасьля гэтага яе сьлед згубіўся. Расьсьледнікі ня выключылі, што Мельнікаву магла завэрбаваць вайсковая выведка Беларусі.
5 кастрычніка маёр контрвыведкі Агенцтва ўнутранай бясьпекі ў адстаўцы, супрацоўніца факультэту міжнародных дачыненьняў Беластоцкага ўнівэрсытэту Ганна Грабоўска-Сівец у эфіры польскай тэлевізіі выказала меркаваньне, што Мельнікава была завэрбаваная і супрацоўнічала зь беларускімі спэцслужбамі яшчэ да эміграцыі.
Паводле фактаў спробаў вярбоўкі супрацоўнікаў НАУ спэцслужбамі Беларусі Акруговая пракуратура Варшавы завяла крымінальную справу.
Форум