Два памежныя пераходы з Беларусьсю — Кузьніца Беластоцкая-Брузгі і Баброўнікі-Бераставіца — зноў адкрыюцца ў панядзелак, 17 лістапада, гаворыцца ў афіцыйным паведамленьні Міністэрства ўнутраных спраў Польшчы.
«Гэтае рашэньне стала магчымым дзякуючы ўзмоцненай ахове мяжы з Беларусьсю», — адзначаецца ў паведамленьні.
- Абодва пераходы будуць адкрыты для пасажырскіх перавозак, а ў Баброўніках — таксама для «абмежаваных грузавых перавозак».
- Пераход у Кузьніцы адкрыты толькі для пасажырскіх перавозак, за выключэньнем аўтобусаў.
- У Баброўніках таксама будзе дазволены аўтобусны рух і грузавы рух для транспартных сродкаў з краін Эўрапейскага Зьвязу, удзельніц Пагадненьня аб Эўрапейскай эканамічнай прасторы і Швайцарыі.
Варшава раней заяўляла пра гатоўнасьць адкрыць гэтыя два пераходы (Кузьніца была закрытая з 9 лістапада 2021 году, а Баброўнікі з 10 лютага 2023 году), але гэтыя пляны былі адкладзены пасьля рашэньня Літвы закрыць мяжу з Беларусьсю.
«Мы можам падзякаваць нашым партнэрам у Польшчы за тое, што яны трымалі памежныя пункты з Беларусьсю закрытымі значна даўжэй, чым плянавалася», — пракамэнтаваў 14 лістапада цяперашняе рашэньне Альгірдас Дабравольскас, дарадца прэм’ер-міністаркі Літвы Інгі Ругінене.
ГЛЯДЗІЦЕ ТАКСАМА: Афіцыйны Менск адкладае перамовы зь Літвой да аўторка. Польшча адкрые Кузьніцу і Баброўнікі ў панядзелак ГЛЯДЗІЦЕ ТАКСАМА: Пачобут — вялікі герой. І той, хто даможацца яго вызваленьня, таксама будзе героем, — польскі журналіст Патоцкі