Экс-камандзір падразьдзелу беларусаў ва ўкраінскім войску прызнаў, што лік жаўнераў не адпавядае статусу палка

На пытаньне выданьня «Люстэрка», ці зьяўляецца беларускі падразьдзел полкам паводле колькаснаага складу байцоў, Павал Шурмей адказаў:

«Я адкажу: не. І, калі ўжо вяртацца ў гісторыю, гэта (тое, што называлі палком. — РС) была работа на пэрспэктыву. Ну, як ёсьць, так ёсьць».

У пачатку кастрычніка тагачасны камандзір палку Каліноўскага Павал «Дзядзька» Шурмей апублікаваў відэаазварот, у якім паведаміў пра зьмены ў кіраўніцтве фармаваньня, а таксама агучыў пляны пашырэньня палітычнай дзейнасьці. Паводле яго, цяпер усе ключавыя рашэньні будзе прымаць рада камандзіраў, будзе створаная вэтэранская арганізацыя «Каліноўцы», афіцыйна прадстаўляць якую будзе Ян Мельнікаў.

У ліпені 2024 году полк імя Кастуся Каліноўскага абвясьціў пра закрыцьцё свайго рэкрутынгавага цэнтру ў Варшаве. Тады паведамлялася, што за 2,5 года вайны празь яго прайшлі некалькі тысяч беларусаў і тоны важных тавараў для фронту. Спыненьне ўласнага рэкрутынгу было зроблена на выкананьне кіраўніцтва Інтэрнацыянальнага легіёну Мінабароны Ўкраіны. Пасьля гэтага новых байцоў набіралі праз сыстэму гэтага легіёну ва Ўкраіне.