Хмяльніцкая і Ровенская АЭС (апошняя паблізу Беларусі) апошнія 10 дзён працуюць на паніжанай магутнасьці, бо расейскія войскі пашкодзілі электрападстанцыю, прыцыпова значную для ядзернай бясьпекі.
Як адзначаецца ў паведамленьні Міжнароднага агенцтва атамнай энэргіі (МАГАТЭ, IAEA), падстанцыі ёсьць крытычна важнымі вузламі ў электрасетцы краіны, а атамныя станцыі выкарыстоўваюць іх для падтрыманьня вонкавых крыніц электраэнэргіі, якая сілкуе сыстэмы бясьпекі і ахалоджваньня.
Праз расейскую атаку абедзьве гэтыя станцыі засталіся толькі на адной лініі электраперадач — другая была пашкоджаная.
«Надзейнае электразабесьпячэньне па-за пляцоўкай мае жыцьцёва важнае значэньне для падтрыманьня і функцыянаваньня ядзернай бясьпекі. З гэтай мэтай экспэрты агенцтва праз спэцыяльныя экспэртныя місіі працягнуць ацэнку функцыянальнасьці падстанцыяў, якія маюць вырашальнае значэньне для ядзернай бясьпекі», — заявіў генэральны дырэктар МАГАТЭ Рафаэль Гросі.
ГЛЯДЗІЦЕ ТАКСАМА: Ва Ўкраіне пашкоджаныя падстанцыі на дзьвюх АЭС і чыгунка, ёсьць ахвяры. Вынікі новых расейскіх абстрэлаўРасейскія войскі сама меней двойчы атакавалі падстанцыі Паўдзённаўкраінскай і Хмяльніцкай АЭС — у ноч на 31 кастрычніка, а Ровенскай і Хмяльніцкай АЭС — у ноч на 7 лістапада. Тады МАГАТЭ таксама папярэджвала аб пагрозах для ядзернай бясьпекі і заклікала да «максымальнай ваеннай стрыманасьці ў ваколіцах ядзерных аб’ектаў і поўнага выкананьня сямі неад’емных прынцыпаў ядзернай бясьпекі».
У той жа час Расею як крыніцу гэтай небясьпекі ў заяве ня згадвалі ні тады, ні цяпер.