Паводле зьвестак Сьледчага камітэту, у Берасьці загінуў рабочы, а ў Менску іншы знаходзіцца ў вельмі цяжкім стане.
Сьледчыя завялі крымінальныя справы. У іх сур’ёзныя пытаньні да выкананьня правілаў бясьпекі на будоўлях, піша Telegraf.
У Берасьці здарэньне адбылося на вышыні пятага паверху. З высноваў папярэдняга расьсьледаваньня вынікае, што трое працоўных — абліцоўнік-плітачнік, тынкоўнік і цясьляр — упалі разам з падвеснага будаўнічага памосту.
Уся канструкцыя «нахілілася і разам з апорнымі элемэнтамі павалілася на зямлю». У выніку адзін з рабочых, 44-гадовы абліцоўнік-плітачнік, загінуў на месцы. Два ягоныя калегі, якім 35 і 42 гады, атрымалі траўмы і трапілі ў лякарню.
Абвальваньне ў Менску
На вуліцы Сьцебянёва ў Менску адбыўся іншы выпадак, які ледзь не прывёў да трагедыі. Паводле вэрсіі сьледзтва, 51-гадовы дапаможны працоўны займаўся дэмантажом сьцяны. Раптам цагляная кладка ня вытрымала і абрынулася на яго.
Пацярпелага мужчыну даставілі ў лякарню, дзе лекары ацанілі ягоны стан як «вельмі цяжкі».
Сьледчыя з Кастрычніцкага РАСК Менску пакуль спрабуюць зразумець, што прывяло да абвальваньня.
ГЛЯДЗІЦЕ ТАКСАМА: На шахце ў Салігорскім раёне «захрасла» транспартная кабіна, цяжка траўмаваныя пяць работнікаў. СК завёў справу