Вечарам 22 лістапада ў Бярэзані (Беразіно) мужчына зьнянацку некалькі разоў ударыў нажом міліцыянта, які падышоў, каб праверыць у яго дакумэнты.
Паводле паведамленьня МУС, мужчына быў падобны на нейкага падазраванага, па якога прыехаў нарад міліцыі пасьля выкліку.
Пасьля гэтага нападнік уцёк.
За ягоныя пошукі ўзяліся мясцовыя міліцыянты ўлучна з кіраўнікамі, а таксама сілавікі з Галоўнай управы крымінальнага вышуку, АМАПа, «Алмаза», унутраных войскаў.
На месца здарэньня прыехаў міністар унутраных спраў Іван Кубракоў.
Нападніка затрымалі сёньня каля 14:30 у лесе. Ён, паводле МУС, «аказаў супраціўленьне, праявіў агрэсію» і зноў «пайшоў на міліцыянта з нажом».
Як вынікае з паведамленьня, каб затрымаць, падазраванага паранілі стрэлам. «Прымянялася зброя. Мужчыну аказваецца мэдычная дапамога», — гаворыцца ў допісе МУС.
Параненаму міліцыянту таксама аказалі ўсю неабходную дапамогу ў шпіталі.
ГЛЯДЗІЦЕ ТАКСАМА: Сьледчы камітэт агучыў дэталі забойства жанчыны ў Менску і плянаваньня помсты яшчэ 40 чалавекам