Паводле сьледзтва, ён зрабіў гэта на замову расейскіх спэцслужбаў, перадае LRT.
Бардадзіму пагражала 5 гадоў пазбаўленьня волі, але тэрмін быў зьменшаны на траціну, бо ён прызнаў віну і таму справу разглядалі паводле скарочанай працэдуры.
Паводле сьледзтва, Бардадзім і ягоны саўдзельнік, таксама грамадзянін Украіны, на замову расейскай спэцслужбы абяцалі падпаліць і падарваць гандлёвыя цэнтры ў Літве і Латвіі, каб прымусіць улады гэтых краін і ўсяго ЭЗ да «скарачэньня або спыненьня падтрымкі Ўкраіны», а таксама для дэстабілізацыі дзяржаўных структураў.
Бардадзім схаваў у адным з аддзелаў IKEA запальную прыладу з гадзіньнікавым мэханізмам, якая спрацавала каля 4-й гадзіны раніцы 9 траўня 2024 году. Той жа ноччу ён выехаў у Варшаву. Праз тое, што пажар адбыўся ноччу, ніхто не загінуў і не пацярпеў. Шкода гандлёваму цэнтру склала 485 тысяч эўра. Пракуратура назвала гэты ўчынак тэрактам.
ГЛЯДЗІЦЕ ТАКСАМА: Ад Лёндана да Вільні: як зьвязаныя з Расеяй структуры наймаюць моладзь для дывэрсій супраць краін Эўразьвязу13 траўня Бардадзім вярнуўся ў Літву, каб забраць з схову сродкі, прызначаныя для іншай дывэрсіі — на тэрыторыі Латвіі. У той жа дзень яго затрымалі ў аўтобусе па дарозе ў Рыгу. На той час яму было 17 гадоў.
Паводле матэрыялаў справы, яму ў якасьці ўзнагароды абяцалі аўтамабіль BMW 530, а таксама — разам з саўдзельнікам — 10 тысяч эўра.
«Сабраныя зьвесткі дазволілі зрабіць выснову, што арганізатары — расейская ваенная разьведка. У гэтым кірунку расьсьледаваньне працягваецца», — заявіў раней кіраўнік Дэпартамэнту расьсьледаваньня арганізаваных злачынстваў Генпракуратуры Літвы Артурас Урбяліс. Паводле яго, крама IKEA была абраная таму, што гэтая гандлёвая сетка сышла з Расеі.
Саўдзельніка Бардадзіма затрымалі ў Польшчы і будуць судзіць там.
Данііл Бардадзім нарадзіўся ў Хэрсоне і зьехаў з Украіны пасьля расейскага ўварваньня.
ГЛЯДЗІЦЕ ТАКСАМА: Расьсьледаваньне: расейскія дывэрсанты ледзь не ўчынілі выбухі ў жылым доме ў Вільні