Віленскі аэрапорт а 18:09 у нядзелю, 30 лістапада заявіў пра часовае закрыцьцё з прычыны мэтэазондаў, якія зноў заўважылі ў паветранай прасторы каля ўзьлётных палосаў.
Спачатку дырэкцыя аэрапорту паведаміла, што рэйсы адкладаюцца да 21:00, затым да 23:00. Аднак і тады аэрапорт не аднавіў працы. Толькі а 5-й гадзіне раніцы праца была дазволеная, паведаміў аэрапорт на сваёй старонцы.
Больш за 7400 пасажыраў і 50 рэйсаў пацярпелі ад гэтых часовых абмежаваньняў паветранай прасторы: 31 рэйс быў скасаваны, 10 перанакіраваныя і 9 затрыманыя.
Дырэктар кампаніі «Oro navigacija» Саўлюс Батавічус у этэры Радыё LRT заявіў, што гэта сыстэмная атака супраць цывільнай авіяцыі.
«Балёны запускаліся праз пэўныя прамежкі часу, каб увесь час хаця б некалькі зь іх знаходзіліся ў крытычна важных для руху ў Віленскім аэрапорце месцах. Мы маглі толькі бясьсільна назіраць за тым, як гэтыя балёны вісяць, і не маглі аднавіць рух у аэрапорце», — кажа Батавічус.
ГЛЯДЗІЦЕ ТАКСАМА: Паветраныя балёны за ноч двойчы прымусілі Віленскі аэрапорт прыпыняць працу. Мэтэазонды кантрабандыстаў упалі і ў ЛатвііПапярэдні раз Віленскі аэрапорт закрываўся зь вечару пятніцы, 28 лістапада, да ранку суботы, 29 лістапада.
Закрывалася лётнішча і 26 лістапада, але тады прычынай былі не паветраныя балёны з кантрабандай зь Беларусі, а самалёт, які выехаў з дарожкі руляваньня з прычыны непагадзі. Тады аэрапорт закрывалі амаль на восем гадзін.
У ноч з 23 на 24 лістапада праца аэрапорту прыпынялася праз мэтэазонды двойчы. Тады скасавалі пяць рэйсаў. Тады ж беларускія мэтэазонды ўпершыню знайшлі ў суседняй Латвіі.
ГЛЯДЗІЦЕ ТАКСАМА: Правакацыі на мяжы — супраць беларуска-літоўскай агульнай памяці. Ліст Сяргея Дубаўца да менскага сябраЗакрыцьцё пераходаў на мяжы Літвы і Беларусі
- 8 жніўня 2023 году Літва закрыла пункты пропуску Шумск (з боку Беларусі Лоша) і Цьверач (Відзы), 1 сакавіка 2024-га — Лаварышкі (Катлоўка) і Райгорад (Прывалка). На мяжы зь Беларусьсю працягвалі працаваць два памежныя пераходы — Меднікі (Каменны Лог) і Салечнікі (Беняконі).
- Урад Літвы стаў задумвацца пра поўнае закрыцьцё мяжы зь Беларусьсю пасьля таго, як у кастрычніку некалькі разоў вымушана прыпынялася праца аэрапортаў у Вільні і Коўне з прычыны зьяўленьня паблізу іх аэрастатаў, якія, паводле заяваў МЗС Літвы, ляцелі зь Беларусі, несучы кантрабанду, перадусім цыгарэты.
- Да 27 кастрычніка памежная служба Літвы падчас залёту балёнаў з кантрабанднымі цыгарэтамі двойчы цалкам закрывала мяжу зь Беларусьсю на некалькі гадзін уначы. Упершыню мяжа была закрытая ў ноч на 22 кастрычніка.
- А з 27 кастрычніка Літва закрыла яе для беларусаў цалкам, з пэўнымі выняткамі, напрыклад, для вяртаньня на радзіму грамадзян Літвы і для машын з дыпляматычнымі нумарамі. Пункты пропуску на мяжы Літвы і Беларусі Меднікі (Каменны Лог) і Салечнікі (Беняконі) таксама закрылі.
- Урад Літвы заявіў, што мяжа цалкам закрываецца да 30 лістапада, але тэрмін можа быць падоўжаны, калі сытуацыя з залётамі балёнаў не палепшыцца.
- Улады Беларусі ў адказ 31 кастрычніка забаранілі літоўскім грузавікам выяжджаць цераз польскую і латвійскую мяжу.
- Ад 3 лістапада ўлады ў Менску ўвогуле забаранілі рух па тэрыторыі Беларусі грузавікам, зарэгістраваным ува ўсіх краінах Эўразьвязу.
- 10 лістапада на загад Аляксандра Лукашэнкі ўсе літоўскія фуры, якія знаходзяцца ў Беларусі, сабралі на адмысловых пляцоўках і ўзялі пад ахову з выстаўленьнем рахункаў — 120 эўра на содні. Паводле Лукашэнкі, фураў было больш за 1100.
- Увечары 10 лістапада Літва зьвярнулася да Менску з просьбай дазволіць выезд грузавікоў сваіх кампаніяў у Літву. Неўзабаве стала вядома, што Менск адмовіў.
- Міністар унутраных справаў Літвы Ўладзіслаў Кандратовіч у інтэрвію Свабодзе прызнаў, што закрытыя пераходы выкарыстоўваліся таксама для перадачы сродкаў на кантрабанду цыгарэт у Літву, і гэта пачалі вывучаць літоўскія крыміналісты.
- Лукашэнка 31 кастрычніка заявіў, што літоўцы «самі з тэрыторыі Беларусі перакідалі цыгарэты на мэтэаралягічных зондах», каб зарабіць на перапродажы.
- Вільня марна спрабавала вярнуць транспарт шляхам кантактаў на ведамасным узроўні. Беларусь прапанавала Літве або скасаваць рашэньне аб закрыцьці мяжы, або выйсьці на палітычна-дыпляматычнае разьвязаньне праблемы.
- 28 кастрычніка Польшча заявіла, што гатовая адкрыць два памежныя пераходы зь Беларусьсю ў лістападзе. Але 30 кастрычніка пасьля кансультацыяў зь Літвой перанесла гэты неназваны тэрмін яшчэ на некалькі тыдняў. Толькі 17 лістапада адкрыліся двух пункты ў Баброўніках (з боку Беларусі Бераставіца) і ў Кузьніцы (Брузгі). У той жа час кіраўнік МЗС Літвы Кястуціс Будрыс заявіў, што Літва можа адкрыць два закрытыя памежныя пераходы зь Беларусьсю раней за 30 лістапада.
- 19 лістапада ўрад Літвы вырашыў, што закрытыя ў кастрычніку два пункты пропуску на мяжы Літвы і Беларусі Меднікі (Каменны Лог) і Салечнікі (Беняконі) адкрыюцца з 20 лістапада.
- Перад гэтым рашэньнем прэмʼер-міністарка Інга Ругінене заявіла, што апошнім часам паветраных балёнаў з кантрабандавымі цыгарэтамі стала меней. Ругінене таксама адзначыла, што былі «пэўныя пазытыўныя рэчы» і з боку Беларусі.
- Пераходы Меднікі (Каменны Лог) і Салечнікі (Беняконі) зноў адкрыліся 20 лістапада.