Паводле закону, пакупнік, які зьяўляецца нерэзыдэнтам Эўразьвязу, мае законнае права на вяртаньне Падатку на дадзеную вартасьць (ПДВ/VAT). Але супрацоўнікі крамы заявілі, што сыстэма «не дазваляе» правесьці такую апэрацыю. У выніку беларус, што набыў Play Station, страціў магчымасьць атрымаць 400 злотых ($110) — суму, якая падлягае вяртаньню.
«Я папрасіў паклікаць мэнэджэра. Сабраліся хіба чатыры чалавекі, яны ў адзін голас казалі, што гэта немагчыма. Я адчуў, што гэта толькі таму, што я беларус. Я папрасіў іх паказаць закон, які не дазваляе гэта зрабіць, ці ўнутраныя інструкцыі. Яны разводзілі рукамі. Гэта вельмі прыніжальна. Тут справа зусім не ў грашах, хаця і яны немалыя. Справа ў стаўленьні да чалавека. Гэта было абуральна», — расказвае Андрэй (імя зьмененае — РС).
Беларус падаў афіцыйную скаргу ва Ўпраўленьне правоў спажыўцоў. На яго думку, адмова крамы «ня мае прававых падставаў» і носіць «неабгрунтаваны дыскрымінацыйны характар».
Паводле права Эўразьвязу, усе нерызыдэнты ЭЗ могуць вяртаць ПДВ/VAT пры вывазе тавараў за межы ЭЗ незалежна ад грамадзянства. Абмежаваньні датычаць толькі асобных катэгорый тавараў з падвойным прызначэньнем і не тычацца звычайнай спажывецкай электронікі, такой як гульнявыя прыстаўкі.
Ці PlayStation пад забаронай?
Радыё Свабода папрасіла патлумачыць MediaMarkt, на якой падставе яны адмовілі аформіць TaxFree пакупніку зь Беларусі. Прэс-сакратар кампаніі Мацей Далега спаслаўся на Пастанову Рады Эўразьвязу № 765/2006. Яна датычыць абмежавальных мераў у сувязі з сытуацыяй у Беларусі і ўдзелам Беларусі ў агрэсіі Расеі супраць Украіны. Мы ўважліва вывучылі гэты дакумэнт. У ім нідзе ня згадваецца забарона на ўвоз у Беларусь гульнявых прыставак PlayStation. З гэтым пагадзіўся і прэс-сакратар MediaMarkt, але дадаў:
«Актуальная вэрсія пастановы 765/2006 забараняе продаж электронікі, у якую ўваходзяць, сярод іншага, кантралёры для відэагульняў. Гульнявая прыстаўка Sony PlayStation 5 Slim непасрэдна не клясыфікуецца як тэхналёгія падвойнага прызначэньня, аднак можа так разглядацца, таму MediaMarkt праяўляе асаблівую асьцярожнасьць адносна такіх тавараў і магчымасьці іх вывезьці на тэрыторыю Беларусі». — патлумачыў Мацей Далега.
Як запэўніў прадстаўнік кампаніі, фармуляр ня мог быць выдадзены беларусу, паколькі гэта раўназначна жаданьню ўвезьці PlayStation у Беларусь. Нягледзячы на тое, што сама гульнявая прыстаўка не знаходзіцца ў «чорным сьпісе» Эўразьвязу, прэс-сакратар гандлёвай сеткі лічыць адмову афармленьня Tax Free беларусу «цалкам абгрунтаванай і легальнай». Пры гэтым, ані польскія мытнікі, ані памежнікі, не перашкодзілі беларуску вывезьці набытую ў MediaMarkt прыстаўку ў Беларусь.
На ўдакладняючае пытаньне Свабоды, кім і паводле якіх крытэраў PlayStation можа разглядацца як электроніка падвойнага прызначэньня, калі яе няма ў пераліку, нам дагэтуль не адказалі. Пры гэтым, падобныя прыстаўкі свабодна экспартуюцца і прадаюцца ў Беларусі. Таму, выглядае, унясеньне PlayStation у «чорны сьпіс» зьяўляецца чыёйсьці інтэрпрэтацыяй і перастрахоўкай, але ніяк не прамым патрабаваньнем Эўразьвязу.
Радыё Свабода адправіла запыт у Міністэрства фінансаў Польшчы з просьбай пракамэнтаваць здарэньне і прадставіць сваю інтэрпрэтацыю Пастановы Рады Эўразьвязу. Дагэтуль ведамства Свабодзе не адказала. Калі мы атрымаем адказ, то вернемся да гэтай гісторыі і апублікуем яго.
ГЛЯДЗІЦЕ ТАКСАМА: Чэская пошта спыніла прыём адпраўленьняў у Беларусь